Dömurnar norðanheiða hófu annan starfsvetur sinn í september 2008. Hópur af konum fór saman á ráðstefnuna sem JesúKonur héldu í lok september og fögnuðu svo fyrstu JesúKonu stundinni hér í október. Nærvera Heilags Anda hefur verið sterk á stundunum þar sem konurnar eru hvattar til að gefa gætur að hvorri annarri og uppörva hvor aðra. Í litlu samfélagi er gott að geta prófað sig áfram í þeim gjöfum sem við búum yfir eins og að tala Guðs Orð, koma með spádómsorð eða sinna fyrirbænaþjónustu og leiða lofgjörð. Stundirnar hafa verið fjölbreyttar, frá ljúfum en kröftugum bænastundum upp í fjölmenn námskeið!

Við fengum Erdnu, Alísi og Erlu í heimsókn til okkar í október þar sem þær töluðu til okkar og blessuðu okkur og stofnuðu formlega JesúKonur á Akureyri. Einnig fengum við aðra góða heimsókn frá Reykjavík en það var Ruth Guðmundsdóttir sem koma með námskeið um Gjafir Andans hingað norður í febrúar. JesúKonur buðu þá karlmönnum að vera með á því námskeiði og voru flestir ánægðir með námskeiðið og spenntir fyrir að finna gjafir sínar og slípa þær til.

Í lok þessa vetrar hittumst við  í heimahúsi  og grilluðum saman. Sú stund var fámenn en mjög góðmenn og Heilagur Andi gaf djörfung, uppörvun og einingu á þeirri stund. Allar konurnar fengu gjöf inn í sumarið sem nú er hafið, að vera  salt jarðar (matteus  5:13). Með því að vera gott salt drögum við fram það besta í náunganum og vinnum leynt og ljóst að því að bæta samfélagið okkar.

Einnig gekk út hvatning um að íhuga og biðja Drottinn um að leiða okkur inn í gjafir okkar og sýna okkur hvernig við getum nýtt þær í þessu starfi og okkar daglega lífi sem JesúKonur.

Drottinn blessi ykkur margfaldlega og ríkulega